«Ата Заңым – айбарым!». Елдігімізге тұғыр болған Конституцияның 30 жылдық мерейтойына орай Шымкент қаласында осы тақырыпта салтанатты жиын өтті. Шарада азаматтардың еркіндігі мен қоғам дамуына кепіл болған Конституция негіздері ұлықталды .
Ұлы Дала төсінде әділдік пен туралықты ту еткен билер институты, әз-Тәукенің жеті жарғысы халқымыздың құқықтық мәдениетін қалыптастырған асыл қазына. Мерекеге орай сахнада еліміздің осындай тарихи кезеңдері бейнеленді. Мұнан соң зәулім сарайда көк Туымыз желбіреп, Елтаңба ардақталды, Әнұран шырқалды.
Ғабит Сыздықбеков, қала әкімі:
Бұл — Тәуелсіздігіміздің ең ұлы жетістіктерінің бірі. Себебі Конституция — елдің негізі заңы ғана емес, мемлекетіміздің тірегі, қоғамның тұғыры.
Мерекелік жиында қоғамның әр саласында ерен еңбек етіп, ел дамуына үлес қосып келе жатқан азаматтар марапатталды.
Шекербек Шахабаев, мектеп-лицей мұғалімі:
30 жылдың ішінде мұғалім мәртебесі асып келе жатыр. Жаңартылған бағдарлама, келешекке жақсы, жоғары білімді балаларды тәрбиелеу ісі қолға алынды.
Шымкент бүгінде еліміздегі ең қарқынды дамып келе жатқан аймақ саналады. Республикадағы дербес қала мәртебесіне ие болған 7 жылдың ішінде өндіріс пен кәсіпкерлік степ, елдің әлеуметтік жағдайы мейілінше жақсарды.
Бұхарбай Парманов, қоғамдық кеңес төрағасы:
Тәртіптің сақталуы, сөз бостандығы және экономиканың дамуы – Қазақстан халқының әлеуметтік жағдайын жақсартып, білім алуына, елдің өсіп-өркендеуіне зор үлес қосып отыр.
Салтанатты жиында жұртшылық ұлттық рухты көтеретін музыкалық, хореографиялық және театрландырылған қойылымдарды тамашалады. Әділдікке негізделген заң үстемдігі мегаполис халқының бойында келешекке, қоғам дамуына деген берік сенім орнатты.
Ғани Қалмаханов
