Жамбыл облысында отбасылық зорлық-зомбылық мәселесі өзекті болып тұр.
Былтыр 3 мыңнан аса дерек тіркелсе, биыл 7 айдың өзінде әйелдерге қарсы 2 608 құқықбұзушылық жасалған. Осыған орай дағдарыс орталығында орын саны ұлғайып, зардап шеккендерге тиісті көмек көрсетіліп жатыр.
Жамбыл облысында тұрмыстық зорлық-зомбылық құрбандарына арналған екі орталық бар. Бірі Қордай ауданында болса, екіншісі Таразда. Дағдарыс орталығына жүгінгендердің бірі – бес баланың анасы, 40 жастағы мына келіншек. Жүзін жасырын ұстауды өтінген әйел соңғы сегіз жыл бойы күйеуінің зорлық-зомбылығына ұшырағанын айтты. Айтуынша, жұбайы ішімдікке әуес болып, соңғы уақытта балаларына да қол көтере бастаған.
Салтанат, қала тұрғыны:
- Екі үлкен қызыма көп қол көтеретін, балағаттап боқтайтын сөздер айтатын. Бұл жаққа қатты стреспен келдік. Балаларым да стресте болды. Балалар психологы бөлек жұмыс істеді. Қазір өз-өзімізге келдік. Барлығымыздың жағдайымыз жақсы. Жұмысқа шығып, ұлдарымды, қыздарымды жеткізіп, оқуға түсіріп әрі қарай жеткізу менің арманым.
Тараздағы дағдарыс орталығы 2014 жылы 25 орынға шақталып ашылған. Былтыр орын саны екі есе артты. Жыл басынан бері 56 әйел мен олардың 170 баласы орталық көмегін алған. Қазір мекемеде 13 ана мен 40 бала тұрып жатыр. Мұнда тегін тамақ беріліп, психологиялық, құқықтық, әлеуметтік көмек көрсетіледі.
Айдана Биғабылова, Тұрмыстық зорлық-зомбылық құрбандарына әлеуметтік көмек көрсету орталығының директоры:
- «Анаға тағзым» отбасын қолдау орталығы арқылы дағдарыс орталығына түскен әйелдерді қысқа мерзімді курстарға бет әрлеу, шаштараз, аспаздық бойынша курстарды оқытамыз. Одан кейін балалар орталығына балалар келеді. Оларды үйірмелерге тегін қатыстырамыз. Біз бір жақты ғана жұмыс жасамаймыз. Ішкі істер органдарымен бірлесіп, агрессор жолдастарымен, жанжал шығарушылармен бірге жұмыс жасаймыз. Оларды қайта отбасына қосуға тырысамыз.
Былтыр аймақта отбасылық-тұрмыстық зорлық-зомбылық бойынша 3300-ден астам оқиға тіркелген. Ал биыл 7 айдың өзінде 2608 әкімшілік құқық бұзушылық дерегі анықталды. Тәртіп сақшылары кінәлілердің бір бөлігіне ескерту жасаса, 381 агрессорды 15 тәулікке дейін қамауға алған.
Диляфруз Кенжеханова, Отбасылық-тұрмыстық зорлық-зомбылыққа қарсы күрес бөлімінің бастығы:
- Полиция департаментінде тұрмыстық зорлық-зомбылықтың алдын алу бағытында көптеген жедел алдын алу жұмыстары жүргізіледі. Солардың бірі «Бақытты отбасы – бақытты ел» жобасы. Ол барлық ауданда жүзеге асып жатыр. Оған қоса 10 ауданда кеңес беру кабинеттері ашылған. Ол жақта әлеуметтік және психолог мамандар жұмыс атқарып жүр.
Былтыр облыста отбасылық-тұрмыстық зорлық-зомбылыққа қарсы күрес бөлімі жұмысын бастады. «Мақсатымыз — бала мен ата-ананы ажырату емес, отбасын сақтап қалу», — дейді тәртіп сақшылары. Сондықтан полицейлер бұрынғыдай құқықбұзушылықтарды тергеумен шектелмей, түсіндіру жұмыстарын жүргізіп, отбасылық жанжалдардың алдын алуға да басымдық беріп жатыр.
Мерей Бает, Бақытжан Бапаев, 24КZ
