Тамыздың соңғы жексенбісі – Кеншілер күні. Кәсіби мерекені «Қазақмыс» кеншілері мен кен байытушылары бірге атап өтті, деп хабарлайды 24kz.
Дәстүрге сай өндірістік компания Сәтбаев қаласында салтанатты кеш ұйымдастырып, еңбек озаттарын марапаттады.
Мыс өндірісі бойынша әлемде үздік ондыққа кіретін «Қазақмыста» 40 мыңға жуық адам еңбек етеді. Жартысынан астамы кеншілер мен байытушылар. Алып компанияның қарыштап дамуына еселі еңбек сіңірген жандар жылдағы дәстүр бойынш биыл да назардан тыс қалмады.
Дастан Рыспеков, облыс әкімі:
- Бұл мереке – кен өндірісінде қажырлы еңбегімен танылған әрбір азаматты ұлықтайтын, жанкештілігіне тағзым ететін күн. Себебі ел экономикасына үлес қосу, болашағымыздың жарқын болуы жолында басын қатерге тіге жүріп, аянбай қызмет етуші кеншілердің адал еңбегі қашан да жоғары марапатқа лайық.
Нұрахмет нуриев, «Қазақмыс корпорациясы» ЖШС басқарма төрағасы:
- «Қазақмыс» – бұл өндірістік компания ғана емес, бұл бірлігі жарасқан үлкен отбасы. Сіздердің әрқайсыңыз сол отбасының бүгіні мен болашағы жолында аянбай тер төгіп келесіздер. Біз өз тарапымыздан сол еңбекті бағалап, соңымыздан ерген өскелең ұрпақтың лайықты білім алуына жағдай жасауға дайынбыз.
Кенші болу үшін табандылық керек. Жеті қат жер астында еңбек етуге екінің бірінің батылы жете бермейді. Жауапты жұмысқа адалдық танытып жүрген қайсар жандар қандай құрметке болса да лайық. Олар «Қазақмыс Холдингі» директорлар кеңесі төрағасының құрмет грамотасымен, «Еңбек даңқы» және «Кенші даңқы» төсбелгісімен марапатталды.
Әмірхан Айназаров, кенші:
- Көңіл-күй енді жақсы! Еңбегіміді бағалап, осылай марапат беріп жатқанына әріптестеріме рахмет. Мен өзім 12 жылдай болды Ғазиз Омаров атындағы шахта қазушы болып істеймін.
Салтанатты жиында кеншілер құрған «Ұлытау» қайырымдылық қоры 2 отбасыға баспана сыйлады. «Қазақмыс» компаниясында тұрмысы төмен отбасыларды баспанамен қамту бағдарламасы бар. 2019 жылдан бері 280 отбасыға пәтер берілді. Биыл жыл соңына дейін тағы 200-ден астам жұмысшыға қызметтік пәтер беріледі.
Авторлары: Елдос Кәкенов, Нұрбол Үздікбаев
