2025 жылдың қаңтар-шілде айындағы дерекке сүйенсек, Ұлттық қордың инвестициялық табысы 4,6 млрд долларды құрады. Бұл туралы Ұлттық банк төрағасы Тимур Сүлейменов мәлімдеді. Оның айтуынша, кейбір сарапшылар айтып жүргендей, қор минусқа кеткен жоқ, деп жазады Egemen.kz.
Базалық мөлшерлемеге қатысты шешімді түсіндіруге арналған жиында журналистер Ұлттық қордың кірісі туралы сұрақ қойды. Сарапшылар арасында қордың инвестициялық кірісі теріс деген пікір айтылған еді.
«2025 жылдың қаңтар-шілде айындағы есебі бойынша, Ұлттық банк қорды басқара отырып 4,6 млрд доллар табыс тапты. Табыстылық тұп-тура 8%-ды құрады, бұл доллармен есептегенде. Ұлттық қорда инвестициялық кіріс бойынша ешқандай шығын жоқ, қайта үш жыл қатарынан Ұлттық қорды басқарудан жақсы инвестициялық табыс түсті», деді Т.Сүлейменов.
Айта кетсек, бұған дейін жарияланған алты айлық есепте де қордың табысы 4,6 млрд доллар болғаны айтылған еді. Қазір Ұлттық қордың жалпы активі 66,2 млрд долларды құрайды.
