Қазақстанда Мемлекет басшысының Жолдауын іске асыру аясында құқық қорғау саласында цифрлы технологияларды кеңінен енгізу жалғасып келеді. Бұл бағытта бірқатар тиімді шаралар қабылданып , олардың нәтижелері байқала бастаған, деп хабарлайды Egemen.kz.
Ел бойынша бейнебақылау жүйесі қарқынды дамып келеді. Қазіргі таңда 19 мыңнан астам камера жасанды интеллект мүмкіндіктерімен жабдықталған. Олар бейнелер арқылы бет-әлпетті тануға, қараусыз қалған заттарды анықтауға, тіпті көлік ағындарын талдауға қабілетті. Бұл жүйелердің Жедел басқару орталықтарымен интеграциясы оқиға орын алған сәтте нақты уақыт режимінде жедел әрекет етуге жол ашады.
Сонымен қатар полиция қызметкерлері заманауи планшеттермен және смарт-жетондармен қамтамасыз етіліп жатыр. Мұндай жаңашылдықтар олардың қызмет тиімділігін арттырып, жағдайға дер кезінде жауап қайтаруына мүмкіндік береді.
Сонымен қатар азаматтарға қолайлы болу үшін «102» мобильді қосымшасы іске қосылды. Бұдан бөлек, eGovMobile және екінші деңгейлі банктердің қосымшаларында «Заң және тәртіп» қызметі пайда болды. Енді кез келген азамат құқық бұзушылық туралы ақпаратты «бір батырма» арқылы жолдап, қоғам мен құқық қорғау органдары арасындағы байланысты жеңілдете алады.
«Алаяқтардың 2,2 млрд теңгені алып қоюына тосқауыл қойылды. Сонымен қатар азаматтардың құқықтық және қаржылық сауаттылығы да артып келеді», деді Ержан Сәденов.
