Орталық Азия елдері трансшекаралық өзендерді тиімді пайдалануға мүдделі.
Ол үшін жаңа технологияның көмегіне жүгініп, суға арнайы қондырғылар орнатылып жатыр. Ташкентте өткен халықаралық су ынтымақтастығы және су заңнамасын жетілдіру тақырыбындағы конференцияда Арал теңізін толтыру мәселесі де қаралды.
Қазақстан мен Өзбекстан үкіметтері бірлесе жүргізген жұмыстардың арқасында вегетациялық кезең ойдағыдай өтті. Тіршілік нәрін үнемдеу мен су пайдаланудағы оң тәжірибелердің нәтижесі Арал теңізіне су жіберу процесі жанданып келеді. Жыл соңына дейін теңіздегі су мөлшері 24 млрд текше метрге жетеді деген болжам бар.
Серік Бекмағамбетов, Халықаралық Аралды құтқару қоры атқарушы комитеті төрағасының орынбасары:
- Әр республикада су саласында қандай жақсы істер істеліп жатса, біз қуанамыз. Қандай оң нәтижелер болса бізге де жақсы, өйткені, егер Өзбекстан елі суды үнемдесе, онда сол су Қазақстанға жетеді, сол су әрі қарай біздің Аралдың толуына да оң әсер етеді.
Бүгінде аймақ елдерінің шаруа қожалықтары суды үнемдеу технологиясын көптеп енгізуде. Сыр мен Әмударияны қатар емген тату көрші елдер суды тек экономикалық мақсатта пайдаланумен шектелмейді. Мәселеге экологиялық тұрғыдан қарау жайы тағы бар.
Равшан Мамутов, Өзбекстанның Олий Мәжіліс депутаты:
- Қоршаған ортаны қорғау мен суды тиімді пайдалану бір бірімен тығыз байланысты. Климаттық өзгерістер уақыт өткен сайын анық байқалуда. Жасыл желекті көбейту, құрғақшылықтың алдын алу мен табиғаттағы тепе теңдікті сақтау мәселесі бүкіл адамзатты толғандыруы тиіс.
Биыл Өзбекстанда құрғақшылық мәселесі өзекті. Шаруалар жылдағыдан екі-үш есе аз өнім алды. Ендігіде аймақ елдері су шаруашылығы саласындағы ынтымақтастықты нығайтып, тапшылықтың алдын алуға бағытталған жұмыстарды жетілдіруге күш салмақ.
Дулат Нуркин
