Алматыда жаңа жылдық шырша шамы жағылды.
Республика сарайының алдына орнатылған бас шыршаның биіктігі 22 метр. Оны безендіру үшін ұзындығы 7 шақырымға жететін гирлянда ілінді. Сондай-ақ мультимедиялық технология, сәндік заттар, ойыншықтар мен сыйлық иллюминациясы кеңінен пайдаланылды. Әсіресе таңнан бері жауған қар қала тұрғындарын ерекше әсерге бөледі. Мерекелік кеш «Кел, Жаңа жыл!» атты вокалды-хореографиялық қойылыммен басталды. Онда қазақстандық сахна жұлдыздары, шоу-балет артистері мен мәнерлеп сырғанаушылар өнер көрсетті. Шара концертке ұласты. Дәл осындай ойын-сауық бағдарламасы қаланың барлық ауданында ұйымдастырылып, халыққа көтеріңкі көңіл-күй сыйлады. Ал кештің басты кейіпкерлері Аяз ата мен Ақшақар қала тұрғындарын келе жатқан жаңа жылмен құттықтап, бақ-береке тіледі.
