Қазақстан Энергетика министрлігі Каспий құбыр Консорциумының (КҚК) теңіз терминалында болған төтенше жағдайға қатысты түсініктеме берді, деп хабарлайды министрлікке сілтеме жасаған KAZ.NUR.KZ.
Энергетика министрлігінің ресми Telegram-каналында хабарланғандай, 2025 жылғы 29 қарашада Астана уақыты бойынша сағат 06:06-да Каспий құбыр Консорциумы (КҚК) теңіз инфрақұрылымының нысандары Новороссийск қаласы маңында пилотсыз су көліктерінің шабуылына ұшырады.
Шабуыл салдарынан екінші сыртқы аялдау құрылғысы айтарлықтай зақымданды. Кешен толық жөндеу-қалпына келтіру жұмыстары жүргізілгенге дейін істен шығарылды.
"Азаматтық маңызы бар инфрақұрылым нысандарына бағытталған мұндай әрекеттерге жол берілмеуге тиіс. КҚК жүйесі – халықаралық энергетикалық жоба және оның нысандарына кез келген күш қолдану жаһандық энергетикалық қауіпсіздікке тікелей қауіп төндіреді, сондай-ақ консорциум қатысушыларының, соның ішінде Қазақстан Республикасының экономикалық мүдделеріне елеулі зиян келтіреді", — деп Энергетика министрлігі бұл жайтқа баса назар аударды.
Теріс салдарды азайту және ірі кен орындарындағы өндіріс қарқынын сақтау мақсатында, министрлік экспорттық көлемдерді балама бағыттарға қайта бағыттау бойынша жедел жоспарды іске қосты.
"Жағдай Қазақстан Республикасы үкіметінің ерекше бақылауында", — делінген министрлік хабарламасында.
Мәтіннен қате тапсаңыз, бізге жазыңыз
