Атырауда зейнетақы жинақтарын стоматологиялық қызметке заңсыз пайдалану дерегі бойынша тергеу жүріп жатыр. Қазірге дейін шамамен 10 адам ұсталды. Іс бойынша бір тұлғаның адвокаты қорғаныс құқығының бұзылғанын мәлімдеді, — деп хабарлайды Massaget.kz тілшісі "Ақ Жайық" басылымына сілтеме жасап .
Не болды?
Еске салайық, 9 қыркүйекте ҚМА басшысы Жанат Элиманов Президент Қасым-Жомарт Тоқаевқа зейнетақы жинақтарын заңсыз қолма-қол ақшаға айналдыру деректері туралы есеп берді. Агенттік стоматологиялық қызметтер арқылы 200 миллиард теңге БЖЗҚ қаражатының негізсіз алынғанын анықтады. Ақша жеке клиникаларға қатысты жалған схемалар арқылы шығарылған.
Отбасы банктің мәліметі
2021 жылдан 2025 жылғы тамызға дейін enpf-otbasy.kz платформасы арқылы тек стоматологиялық қызметтерге 795 424 транзакция жасалып, 757 миллиард теңге жұмсалған. Оның 222 миллиард теңгесі ТОП-20 клиникаға кеткен, олардың жартысы Атырауда, қалғандары Алматы мен Астанада. Атыраудағы бір клиникаға ғана азаматтардан 22,9 миллиард теңге бағытталған.
Сондықтан 15 қыркүйектен бастап Қазақстанда зейнетақы жинақтарын осы қызметтерге пайдалану үшін өтінім қабылдау тоқтатылды. Кейін банк зейнетақыны қайта пайдалану басталатын күнді хабарлады.
Атыраудағы тексерістер
"Ақ Жайық" мәліметінше, елдің әр аймағынан ҚМА қызметкерлері, соның ішінде астаналық департамент өкілдері Атырауға келіп, қаладағы әртүрлі аудандарда тінту жүргізген.
Тергеу барысында шамамен 10 адам ұсталып, олардан үлкен сомадағы ақша, автокөліктер және басқа да бағалы заттар тәркіленді. Алайда іске қатысушылар саны 50-ден асуы мүмкін. Тергеу назарында тек клиника иелері ғана емес, делдалдар, бухгалтерлер және кеңсе қызметкерлері де бар.
Адвокаттың қорғаныс құқығының бұзылуы туралы мәлімдемесі:
Зейнетақы жинақтарын стоматологиялық қызметке негізсіз пайдалану дауына байланысты ұсталғандардың бірінің адвокаты Айдос Кенжебеков өзінің қорғауындағы адаммен кездесуіне кедергі жасалғанын хабарлады.
"Мен оның жағдайын білуге, тыңдалым кезінде қатысуға және іс материалдарымен танысуға міндеттімін. Бұл — адам құқықтарын тікелей бұзу", – деді Кенжебеков.
Оның айтуынша, қызметкерлер тергеу-жедел тобының отырыста екенін алға тартады.
"Бірақ бұл қорғаныс құқығын бұзу үшін негіз емес. Ұсталғаннан бастап әрбір азамат адвокатқа құқылы. Мұнда жасанды кедергілер жасалып отыр", – деп атап өтті адвокат.
Қызықты жаңалықтар мен видеоларды көру үшін TikTok арнамызға жазылыңыз!
