22 жастағы қыз 15 жыл бойы ми ісігіне шалдыққанын білмеген. Никольдің айтуынша, диагнозға меңзейтін бір ғана жанама белгі болған. Америкалық қыз үшін бұл үлкен сынаққа айналды, — деп хабарлайды Massaget.kz тілшісі "Доктор Питерге" сілтеме жасап.
Николь Катлер 15 жыл бойы ми ісігімен өмір сүргенін білмеген. Сол уақыт ішінде диагнозға меңзейтін бір ғана белгі болған.
22 жасында Николь Калифорниядан туған қаласы Бостонға ұшып барған. Бір сәтте оның оң құлағы естімей қалған.
"Алдымен құлағым бітеліп қалған шығар деп ойладым. Бірақ күйеуім оң құлағыма AirPod тағып, дауысты барынша көтергенде де ештеңе естімедім. Сол сәтте бірдеңе дұрыс емес екенін түсіндік", – дейді америкалық қыз.
Катлер бірден дәрігерге барған. Тексеру қорытындысы шошытты: қыздың миында "авокадо көлеміндей" ісік бар болып шықты. Дәрігерлер бұл жаңа түзіліс 15 жыл бойы өсіп келгенін айтты.
"Маған ми ісігі барын айтқанда өмірімдегі ең қорқынышты сәт болды. Бүкіл денем жансызданып қалғандай, әсіресе 22 жасымда елестетуге де қорқынышты еді", – дейді Николь.
Қыз диагнозға меңзейтін бір ғана белгіні есіне түсіре алды. Бала кезінде ол ебедейсіздеу бала болған: жиі жарақат алатын, басы айналып, кейде құлағының мүлде естімей қалатын кездері болған. Бәрі сол ісіктің салдарынан екені анықталды.
Ем мен күрес
2021 жылғы шілдеде өткен алғашқы отада дәрігерлер ісіктің жартысын алып тастады. Бірақ асқынулар ауыр болды: Николь жарты жыл бойы денесінің оң жағын сезбеді, жүре алмады, оң қолын қозғалта алмады.
Одан кейін қыз ұзақ оңалту кезеңінен өтті. Екі ай бойы физиотерапия, логопедия және емдік дене шынықтыру сабақтарына қатысқан.
Биопсия нәтижесінде ісіктің үлкен акустикалық невринома екені анықталды.
Бұл – ми ісігінің сирек түрі, 100 мың адамның шамамен екеуінде ғана кездеседі. Әдетте невринома баяу өсіп, ешқандай белгі бермейді. Алайда ол миға сұйықтық жиналуын туындатып, өлімге әкелуі мүмкін.
Аурудың белгілеріне шаршау, бас айналу, бас ауруы, бір құлақтың естімеуі, құлақтағы шу және тепе-теңдіктің бұзылуы жатады.
2024 жылы дәрігерлер Никольге тағы бір ота жасады: бет бұлшықеттерінің қозғалысын қалпына келтіру үшін сол аяғынан жүйке алып, бетіне көшіріп салды. Осылайша қыздың қайтадан күле алды. Бірақ осы операциядан кейін де Николь қайтадан жүруді үйренуге мәжбүр болды.
Қазір ол ісіктің өспегенін бақылау үшін тұрақты түрде МРТ тексерісінен өтеді. Катлердің айтуынша, емдеу кезеңі оған өте ауыр соққан.
"Мүмкін, мен ешқашан еркін күле алмайтын шығармын, бірақ шын жүректен күлуге үйреніп келемін. Әр процедурамен, әр қадаммен мен жоғалтқанымды қайтара бастадым. Бұл жол өте ауыр болды. Мен өзімнің бір бөлігімді – физикалық та, эмоционалды да, рухани да – жоғалттым, бірақ сонымен бірге тереңірек нәрсені таптым: күш, мақсат және зор қолдау сезімін", – дейді Николь.
Аптаның басты оқиғалары мен пайдалы видеоларды көру үшін YouTube арнамызға жазылыңыз
