Батыс қазақстандық полиция қызметкерлеріне Конституция күні 24 қызметтік көліктің кілті табысталды .
Енді ауылдық жердегі учаскелік инспекторлардың оқиға орнына жедел жетіп, қоғамдық қауіпсіздікті қамтамасыз етуге мүмкіндігі мол. Сондай-ақ тәртіп сақшылары сапына биыл қосылған жас мамандар Отанға адал қызмет етуге ант етті.
Батысқазақстандық полицейлерге былтыр 169 су жаңа көлік табысталса, биыл құқық қорғаушылар 69 темір тұлпарды тізгіндепті. Бұл мақсатқа жергілікті бюджеттен 690 миллион теңге қаржы қаралған. Жыл басынан бері өңірде құқық қорғау органдарының материалдық-техникалық әлеуетін күшейтуге 1 млрд 307 млн теңге бөлінген. Жаңадан бейнебақылау құралдары орнатылып, қажетті жабдықтар алынған. Мұның бәрі заң мен тәртіп қағидатын нығайтуға қызмет етпек, дейді бүгінгі шарада сөз алған облыс әкімі Нариман Төреғалиев.
Нариман Төреғалиев, БҚО әкімі:
- Бұл шаралардың барлығы полиция қызметінің тиімділігін арттыруға, құқық бұзушылықтардың алдын алуға және тұрғындардың қауіпсіздігін қамтамасыз етуге бағытталған маңызды қадамдар. Ата Заңымыз – демократиялық құндылықтар мен азаматтық құқықтарды қорғаудың берік кепілі. Конституцияға сүйене отырып, мемлекетіміздің басты қағидаты заң мен тәртіпті сақтау екендігі бәрімізге аян.
Облыстық полиция департаментінде 2 мың жарым қызметкер қылмыспен күресіп, қоғамдық қауіпсіздікті қамтамасыз етіп жүр. Олардың қатары жыл сайын толығып отырады. Мәселен, биыл 179 жас тәртіп сақшысы атанған.
Арай Зайдекенова, БҚО полиция департаментінің инспекторы:
- Ант қабылдадық Конституция күніне орай. Біз үшін үлкен мәртебе. Жалпы ішкі істер органдарында қызмет атқару бала күнгі әрбір патриот азаматтың арманы деп ойлаймын. Құқық қорғау органдарында қызмет жасау — бұл үлкен жауапкершілік пен табандылықты талап етеді.
Жыл басынан бері құқық қорғау органдарының материалдық-техникалық әлеуетін арттыруға өңірде 1 млрд 307 млн теңге бөлінді.
Е. Жылқайдарұлы, Қ. Ақрап, Э. Аюпов
