Алматыда 2-7 қыркүйек аралығында үстел теннисінен беделді халықаралық "WTT Contender Almaty 2025" турнирі өтеді. Додаға әлемнің түкпір-түкпірінен танымал теннисшілер қатысып, қомақты қаражат пен жүлдері орындар үшін таласады, деп хабарлайды KAZ.NUR.KZ.
Бұл туралы Қазақстанның Үстел теннисі федерациясының ресми сайтынан мәлім болды7
Айта кету керек, Қазақстанда осымен төртінші мәрте өтіп жатқан халықаралық доданың жүлде қоры 100 мың АҚШ долларына тең. Жүлделі орындарды әлемнің 21 елінен 143 спортшы таласқа салады. Олардың қатарында Аустралия, Вьетнам, Германия, Жапония, Иран, Испания, Корея, Қытай, Люксембург, Малайзия, Мексика, Өзбекстан, Румыния, Сауд Арабиясы, Сербия, Сингапур, Словакия, Словения, Үндістан, Франция және Қазақстан бар. Ұйымдастырушылардың айтуынша, мұндай әлемдік маңызы бар спорт шараларының Қазақстанда өтуі, елдің үстел теннисіне деген қызығушылығын арттырып, туристік әлеуетін дамыта түседі.
Турнир кезінде жанкүйерлер үстел теннисінен әлемдік жұлдыздарының ойынын тамашалау мүмкіндігіне ие бола алады. Мәселен, әлемнің үздік 16 спортшысының қатарына кіретін үш дүркін Еуропа чемпионы словениялық Дарко Йоргич, жастар арасындағы әлем чемпионатының күміс жүлдегері, жапониялық спортшы Сора Мацушима, Олимпиада ойындарының күміс жүлдегері, германиялық Шань Сяона, әлем чемпионатының қола жүлдегері Хонока Хашимото (Жапония) кортта бақ сынайды.
Жарыс барысында ерлер мен әйелдер арасында жекелей, жұптық және аралас санаттарда медальдар сарапқа салынады. Сонымен бірге жанкүйерлер арасында да жарыстар кезінде бағалы сыйлықтар ойнатылмақ.
Айта кету керек, бұған дейін Алматыда жасөспірімдер арасындағы "WTT Youth Contender Almaty 2025" турнирі өткен еді. Онда қазақстандық жас теннисшілер 2 күміс, 5 қола жүлде алып, көзге түскен. Оның ішінде үстел теннисінің отандық жас жұлдыздары Алан Құрманғалиев, Злата Стадник, Жания Бекмұхамбетова бар.
Мәтіннен қате тапсаңыз, бізге жазыңыз
