Ұлттық банк төрағасы Тимур Сүлейменов 2026 жылы балаларға Ұлттық қордан төлем жасау мәселесіне тоқталды, деп жазады inbusiness.kz сайты.
Ұлттық банкте өткен брифингте журналистер кей сарапшылардың "биыл Ұлттық қор табыс таппады" деген пікірін алға тартты.
– Қай сарапшылардың айтып отырғанын білмеймін. Биылғы 7 айдың қорытындысы бойынша Ұлттық қорды басқара отырып, 4,6 млрд доллар табыс таптық. Кірістілік 8 пайызды құрады. Инвестициялық кіріс жағынан да шығын жоқ. Керісінше, үшінші жыл қатарынан лайықты инвестициялық табыс алып отырмыз. Бұл қор активтерін ұлғайтуға мүмкіндік береді, – деді.
Оның айтуынша, 2026 жылы балаларға қанша қаражат аударылатыны әзірге белгісіз. Сома бала туу көрсеткішіне, жыл соңында 18 жасқа толатын балалар санына және басқа да факторларға байланысты. Нақты сома 2026 жылдың қаңтарында белгілі болады.
Еске салайық, бағдарлама 2024 жылдың 1 қаңтарында басталған. Ол бойынша 2006 жылдан бастап туған әр балаға жыл сайын Ұлттық қордан қаражат есептеледі.
Қаржы министрлігінің дерегінше, өткен жылы бағдарламаға 2006–2023 жылдары туған 6 919 131 бала қатысты. Әрқайсысына $100,52 есептеліп, жалпы сома $695,5 млн болды. 2024 жылы олардың ішінде 304 815 бала 18 жасқа толып, оларға $30,6 млн төленді.
