Ол салық салу тәсілін түбегейлі өзгертеді, салықтық әкімшілендіруді жеңілдетеді және бизнес пен жеке тұлғаларға арналған цифрлық сервистерді енгізеді.
2026 жылдың 1 қаңтарынан бастап Қазақстанда жаңа Салық кодексі қолданысқа енгізіледі. Бұл туралы ШҚО бойынша МКД басшысының орынбасары Қазыбек Қойшынов Өңірлік коммуникациялар қызметінде өткен брифингте хабарлады, деп жазады inbusiness.kz сайты.
Негізгі өзгерістер:
• Корпоративтік табыс салығы 20% деңгейінде сақталады, бірақ дифференцияланған тәртіппен қолданылады:
банктер мен ойын бизнесі үшін — 25%,
әлеуметтік сала ұйымдары үшін — 2026 жылы 5%, 2027 жылы 10%,
ауыл шаруашылығы өндірушілері үшін — 3% (жеңілдік мөлшерлеме сақталады).
• Қосылған құн салығы 16%-ға дейін көтеріледі.
Дәрі-дәрмек пен медициналық қызметтерге төмендетілген мөлшерлеме белгіленеді:
2026 жылы — 5%, 2027 жылы — 10%.
Ал тегін медицина, әлеуметтік сақтандыру, кітап басып шығару және археологиялық жұмыстар ҚҚС-тан босатылады.
• Жеке табыс салығы прогрессивті жүйеге көшеді.
8 500 АЕК-тен (жылына шамамен 34 млн теңге) асатын табысқа 15% мөлшерлеме қолданылады.
Сондай-ақ дивидендтерге де прогрессивті салық шкаласы енгізіледі.
Бұл ретте зейнетақы төлемдеріне берілетін салықтық жеңілдіктер сақталады.
• Қосымша акциз салығы (10%) енгізіледі, қымбат өнімдерге қатысты:
бағасы 75 млн теңгеден асатын жеңіл автокөліктерге,
100 млн теңгеден жоғары тұратын кемелерге,
литрі 500 мың теңгеден қымбат алкогольге,
бір данасы 10 мың теңгеден асатын сигарларға.
• Егер жылжымайтын мүліктің жалпы құны 450 млн теңгеден асса, мүлік салығы өседі.
• Арнаулы салық режимдері оңтайландырылып, енді үшеуі ғана қалады:
өзін-өзі жұмыспен қамтығандар үшін (мобильді қосымша арқылы төлеу мүмкіндігімен),
жеңілдетілген декларация негізінде,
шаруа қожалықтары үшін.
Цифрландыру және әкімшілендіруді жеңілдету аясында:
• салық есептілігінің нысандары 30%-ға қысқарады,
• декларацияларды алдын ала толтыру жүйесі енгізіледі,
• ҚҚС-ты қайтару тәртібі жеңілдетіледі,
• салық органдары қызмет көрсету моделіне көшеді.
Сондай-ақ салықтық берешекті өндіріп алу ережелері өзгереді:
Қолданылатын шаралар берешек сомасына қарай кезең-кезеңімен жүргізіледі.
Бизнес үшін мүлік кепілі мен банк кепілдігінсіз төлемді кейінге қалдыру және бөліп төлеу мүмкіндігі қарастырылған.
