Nazarbayev University медицина мектебінде жастардың климат жөніндегі ұлттық конференциясы, LCOY Kazakhstan 2025 іс-шарасы өтті. Жастарды климаттық бастамаларға тартатын іс-шара елімізде осымен төртінші мәрте ұйымдастырылды , деп хабарлайды Egemen.kz.
YOUNGO тобы бұрыннан осы мақсатта жұмыс істеп келеді. Қажет болса, көмек көрсетеді. Бастысы, жастардың климаттық өзгерістерге қатысты ұсыныстарын назарға алады. Халықаралық, ұлттық деңгейдегі жобаларды үйлестіреді. Осы жолғы конференцияға да халықаралық ұйымдар, мемлекеттік органдар қолдау көрсеткен. Іс-шара соңында ұйымдастырушылар ел жастары атынан ұсыныс құжатын әзірлеп, YOUNGO-ға жолдайды.Кейін елдегі ұйымдармен, серіктестермен сол құжат аясында жұмыс істейді. LCOY Kazakhstan Ұлттық жастар климаттық конференциясын ұйымдастырушылардың бірі – Аружан Қапарова.
«Біз жастардың климаттық саясатқа араласуына барынша ықпалдасқымыз келеді. Бүгінгі конференцияның екінші сессиясына бірнеше министрліктің өкілдері келіп, жастармен пікірлеседі. Климаттық өзгерістерді, оған бейімделу жолдарын талқылайды. Осылайша, жастар климаттық өзгерістерге қатысты мәселелерді халықаралық сарапшылармен қатар мемлекеттік орган өкілдерімен бірге саралайды. Басқосуға өңірлерден осы бағытта жұмыс істеп келе жатқан белсенді жастарды шақырдық. Олар өз жобаларын, ұсыныстарын ортаға тастайды. Мұндағы мақсатымыз – біздің, жастардың даусын мемлекеттік, халықаралық ұйымдар естісін деген ниет. Жастар климаттық өзгерістерге, саясатқа қазірден араласса, келешекте жемісін көреді», дейді А. Қапарова.
Басқосуға Назарбаев университетінен бөлек, Нархоз Университетінінен, Біріккен Ұлттар Ұйымының Балалар қорынан, ЮНЕСКО-ның Алматы қаласындағы өңірлік кеңсесінен, БҰҰ Даму бағдарламасынан, елдегі Фридрих-Эберт қорынан және басқа да халықаралық, мемлекеттік ұйымдардан қонақтар келді. Баяндамашылар тақырыпқа қатысты өзекті пікірлерін, ұсыныстарын айтты. Соның ішінде Nazarbayev University-діңтұрақты даму жөніндегі директоры, профессор Қанат Байғарин климаттық өзгерістерге қатысты нақты шешім қабылдайтын кезең әлдеқашан жеткенін алға тартты.
«1990 жылға дейін-ақ ғалымдар жер шарында климаттық өзгерістер байқалып жатқанын мәлімдеді. Содан он жылда ғылыми-зерттеу жұмыстарын жүргізіп, жаһандық климаттық өзгерістердің шын мәнінде болып жатқанын растады. Осыдан кейін адамзат климаттық өзгерістерді халықаралық деңгейде талқылай бастады. Биыл климаттық өзгерістерге қатысты COP-30 халықаралық конференциясы өткелі отыр. Яғни, бұл конференция 30-шы мәрте ұйымдастырылады. Осы іс-шара арқылы тақырып халықаралық деңгейде талқыланып келеді. Сондықтан қазіргі жастар алдыңғы толқын, аға буын климаттық өзгерістерге төтеп бере алмағанын түсінуі керек. Себебі біз тақырыпты 30 жыл талқылаумен келдік. 1995 жылы COP-тыңбірінші конференциясы өтті. Сол кез Климаттық өзгерістерге қатысты конвенция қабылданды. Климат әлі өзгеріп жатыр. Біз осы тақырыпты тек айтумен шектелмеуіміз керек. Мен өзім де Мемлекет басшысының тапсырмасымен ірі халықаралық іс-шараларға ел атынан талай қатыстым. Енді сөзден іске көшетін кезең келді. Жастар осыны түсінсе екен деймін», деді Қ. Байғарин тақырыптың біз ойлағаннан да салмақты екенін ұқтырып.
Енді конференция қорытындысы бойынша елжастарының атынан Жастардың климат бойынша ұлттық мәлімдемесі әзірленеді. Ол құжат COP-30 конференциясында ұсынылады.
