Мемлекет басшысы Қасым-Жомарт Тоқаев 2019 жылдан бері жүзеге асқан саяси реформалардың нәтижесіне тоқталды.
Оның айтуынша, осы жылдар ішінде елдің саяси жүйесі түбегейлі жаңғыртылып, қоғамда маңызды өзгерістер орын алды, деп жазады inbusiness.kz сайты.
"Біз таңдаған стратегиялық бағыттың дұрыстығына көзіміз жетті. 2022 жылғы референдум халықты бұрын-соңды болмаған деңгейде ұйыстырды. Азаматтарымыздың жаңа саяси бағдарды қолдауы алға ілгерілеуден басқа жол жоқ екенін көрсетті", – деді Президент.
Мемлекет басшысы конституциялық реформалардың арқасында Парламенттің рөлі артқанын, Үкіметтің жауапкершілігі күшейгенін атап өтті. Жаңа талаптарға сәйкес Президент, Сенат, Мәжіліс және мәслихаттар сайлауы өтіп, өкілді билікке түрлі саяси күштер келді. Аралас сайлау жүйесі тәуелсіз кандидаттарға жол ашты.
Сонымен қатар барлық ауыл әкімдері мен биылдан бастап аудан және облыстық маңызы бар қала әкімдері халықтың тікелей сайлауымен анықталатынын айтты.
"Бұл – Орталық Азияда бұрын-соңды болмаған тәжірибе", – деді Қасым-Жомарт Тоқаев.
Президент реформалардың басты мақсаты – халықтың игілігі мен ұрпақтың болашағы екенін атап өтті.
"Әділетті Қазақстанды құру процесін енді ешкім тоқтата алмайды. Біздің Конституциямыз – өркениетті болашаққа жол ашатын Ата Заң", – деп қорытындылады Мемлекет басшысы.
