Қазақстанда үйін, пәтерін немесе басқа да мүлкін жалға беріп жүрген азаматтар үшін жаңа міндет енгізілді, деп хабарлайды Skifnews.kz ақпарат порталы.
Бұдан былай жалға беруден түскен табыс жасырын қалмайды. Мемлекет әрбір тиынды бақылауға алмақ.
Бұрын пәтерін жалға берген көптеген адамдар табысын көрсетпей, жасырын пайда тауып келді. Енді ондай мүмкіндік жоқ. Әр жалға беруші 270 нысандағы арнайы декларация толтырып, мемлекетке өткізуге міндетті. Бұл құжатта жалға беруден түскен табыстың көлемі көрсетіледі. Егер азамат уақытылы тапсырмаса, айыппұл салынады.
Мамандардың айтуынша, бұл талап тек пәтерге ғана емес, басқа да мүлікке қатысты. Яғни гаражын, көлігін немесе автотұрақ орнын жалға бергендер де табысын декларацияға енгізуге тиіс. Сондай-ақ бағалы қағаздардан пайда тапқан азаматтар мен жеке тәжірибемен айналысатындар да есеп беруден қашып құтыла алмайды.
Ең бастысы – декларацияны алғаш рет тапсыратындар «Бастапқы» нұсқасын таңдайды. Ал жыл сайынғы есеп берушілер үшін «Кезекті» нұсқасы бар. Барлық ақпарат «Салық төлеуші кабинеті», eGov немесе e-Salyq Azamat қосымшасы арқылы онлайн қабылданады.
Мамандардың сөзіне сенсек, мемлекет табыс көздерін ашық ету арқылы көлеңкелі экономиканы азайтуды көздеп отыр. «Үйін жалға беріп жүрген азаматтар енді салықтан жалтара алмайды. Барлығы заңды жолмен көрсетілуі тиіс», – дейді сарапшылар.
Уақыт шектеулі. Барлық азаматтар 15 қыркүйекке дейін декларация тапсырып үлгеруі керек. Егер көрсетілген мерзімде орындамаса, айыппұл салынып, қосымша жауапкершілік жүктеледі.
Бұл өзгеріс әлеуметтік желіде үлкен талқылау тудырды. Бірі «әділетті шешім» десе, енді бірі «қосымша ауыртпалық» деп бағалап отыр. Бірақ мамандардың айтуынша, заң бәріне бірдей. Сондықтан пәтерін жалға беріп жүрген әр адам жаңа талаптан қашып құтыла алмайды.
