«Астана Опера» театрының өнерпаздары Қытайда өткен балет әртістерінің бірінші халықаралық байқауынан жеңіспен оралды. Әсіресе жетекші солист Диас Құрманғазы «Үздік орындау» аталымында топ жарса, жас хореограф Сұлтанбек Ғұмар «Үздік хореография» аталымында жүлдегер атанды.

Бұл байқауға 10 елден 400-ден астам өнерпаз қатысқан. Олардың өнерін әлемге танымал Сяо Сухуа (Қытай), Вивиана Дуранте (Италия), Мануэль Легри (Франция), Патрик де Бана (Германия), Владимир Малахов (Ресей), Эльдар Алиев (Әзербайжан) секілді балет майталмандары сарапқа салған.

Айталық, Шэньян сахнасында Диас Құрман­ғазы өнердегі серіктесі Камила Шах­мановамен бірге П.Чай­ковскийдің «Щелкунчик», Р.Дригоның «Талисман» балеттерінен үзінді қой­ды. Сондай-ақ Сұлтанбек Ғұмардың қойылымын­дағы «Аңсау» нөмірін орындады. Соңғы қойылым бағ­дар­­ламаның көркі болды. Себебі қазылар алқасы қойылымдағы пластикалық шешімдердің бірегейлігін жоғары бағалаған.

Жас хореограф Сұлтанбек Ғұмар мұндай қойылым­ды қою туралы ұсыныс әріптес­тері – Диас Құрманғазы мен Камила Шахмановадан түскенін айтты.

– Олардың ұсынысын бірден қабыл алдым. Содан үшеуміз қызу жұмысқа кірістік. Бес күн ішінде «Аңсау» деп аталған жаңа нөмірді жасап шықтық. Оның музыкалық негізі «ХасСақ» этно-фольклорлық тобының аттас композициясы болды. Қойылымға осы әуен зор серпін берді. Бұл музыканы алғаш естігенде қатты ұнатып, оған міндетті түрде би қоюым керек деп ойладым. Енді, міне, сол ойымызды сахнада жүзе­ге асырдық, – деді ол.

Байқауда қазылар алқа­сының мүшелері хорео­гра­фиялық қойылымның ұлт­тық бояуымен бірге «ХасСақ» музыкасының өзгеше саз­дылығына тәнті болған. Сонымен қатар Сұлтанбек Ғұмар осы өнер бәйгесіне қатысуға қолдау көрсеткен Мәдениет және ақпарат ­ми­­нистрлігі мен «Астана Опера» басшы­лы­ғына, балет труп­пасы­ның көр­кемдік же­тек­шісі Алтынай Асылмұ­ра­то­ваға ризашылығын білдірді.