Соңғы күндері Қазақстанның мемлекеттік органдары Aitu отандық мессенджеріне көшіп жатқаны туралы ақпарат тарауда. Оның аясында "енді шетелдік мессенджерлер мемлекеттік қызметкерлер арасында да, жалпы елде де пайдалануға тыйым салынады ма" деген сұрақтар туындауда, деп хабарлайды Zakon.kz.
ҚР цифрлық даму, инновациялар және аэроғарыш өнеркәсібі министрлігі (ЦДИАӨМ) 2025 жылы 20 тамызда осы сипаттағы сыбыстар мен долбарларды жоққа шығарды.
"БАҚ-та таралып жатқан WhatsApp, Telegram және басқа да шетелдік мессенджерлерді қолдануға тыйым салынады деген ақпарат шындыққа жанаспайды. Цифрлық даму министрлігі жеке мақсатта шетелдік сервистерді қолдануға еш тыйым салынбайтынын хабарлайды. Aitu мессенджерін енгізу бастамасы тек орталық және жергілікті мемлекеттік органдарға, сондай-ақ квазимемлекеттік сектор ұйымдарына қызметтік коммуникация үшін ғана ұсынылады. Ол мемлекеттік қызметкерлер тек жұмыс барысында пайдаланатын ақпаратпен қауіпсіз алмасуды қамтамасыз ету мақсатында қолданылады. Мақсаты – ақпараттық қауіпсіздік деңгейін арттыру және қорғалған цифрлық ортаға көшу", делінген министрлік түсініктемесінде.
Aitu қызметтік хат алмасудың, жұмыс чаттарының, жедел хабарламалардың және мемлекеттік цифрлық платформалармен өзара әрекеттесудің негізгі құралына айналады.
"Оның басты артықшылығы – барлық серверлер Қазақстан аумағында орналасқан, бұл деректерді қорғау талаптарына сәйкес келеді және жүйені мемлекеттік органдар үшін сенімдірек етеді. Aitu шетелдік мессенджерлерді азаматтардың жеке өмірінде алмастырмайды және оған "кедергі келтірмейді", ол тек мемлекеттік сектордағы жұмыс процестері үшін қорғалған арнаны қамтамасыз етеді", деп нақтылайды ЦДИАӨМ.
Айта кетсек, 2025 жылғы 11 тамызда жасанды интеллектіні дамыту мәселелері жөніндегі кеңесте Қасым-Жомарт Тоқаев Үкіметке ұлттық мессенджерге көшуді тапсырған болатын.
