2025 жылғы шілде айында Түркия экспорты өткен жылдың дәл осы кезеңімен салыстырғанда 11%-ға өсіп, 24,9 млрд долларға жетті, деп хабарлайды inbusiness.kz сайты Анадолы агенттігіне сілтеме жасап.
Бұл туралы 2 тамыз күні Түркияның Сауда министрлігі мәлімдеді. Ал импорт көлемі 5,4%-ға артып, 31,3 млрд долларды құрады.
Сыртқы сауда айналымы жалпы 56,33 млрд доллар болды. Бұл өткен жылдың шілдесімен салыстырғанда 7,8%-ға артық.
Сыртқы сауда тапшылығы шілде айында 12,1%-ға азайып, 6,4 млрд долларды құрады. Импорттың экспортпен жабылу коэффициенті 4,1 пайыздық тармаққа өсіп, 79,5%-ға жетті. Энергия ресурстары мен алтынды есептемегенде бұл көрсеткіш 91,5%-ды құрады.
Экспорт құрылымында ең үлкен үлес аралық шикізат тауарларына тиесілі – 12,8 млрд доллар (өсім 9,3%). Одан кейін тұтыну тауарлары – 7,94 млрд доллар және күрделі инвестициялық тауарлар – 3,7 млрд доллар.
Түрік тауарлары үшін ең ірі нарық Германия болды – экспорт көлемі 1,9 млрд доллар. Сондай-ақ алғашқы ондыққа Ұлыбритания, АҚШ және Еуропалық одақ елдері кірді. Жалпы экспорттың 48,5%-ы осы елдерге тиесілі.
Импорттың басым бөлігі аралық шикізаттан тұрды – 20,4 млрд доллар. Сонымен қатар, күрделі жабдықтар – 5,38 млрд доллар және тұтыну тауарлары – 5,35 млрд доллар болды. Негізгі импорттаушы елдер – Қытай, Ресей және Германия.
2025 жылдың қаңтар-шілде аралығында Түркия экспорты 5,2%-ға өсіп, 156,4 млрд долларды құрады. Ал импорт көлемі 6,9%-ға артып, 212,2 млрд долларға жетті. Осы кезеңдегі сыртқы сауда тапшылығы 12,2%-ға артып, шамамен 56 млрд доллар болды.
Түркияның Сауда министрі Өмер Болаттың айтуынша, шілде айындағы экспорт көлемі – ел тарихындағы ең жоғары айлық көрсеткіш.
"Шілде айында экспорт көлемі 25 млрд долларға жетіп, рекорд жаңартылды. Бұл өткен жылмен салыстырғанда 11%-ға артық", – деді министр.
