Президент Қасым-Жомарт Тоқаев қазақстандықтардың Алакөл төңірегіндегі туристік аймақтың жағдайына қатысты шағымдарына жауап берді, деп хабарлайды Zakon.kz.
Бұл туралы 2025 жылдың 10 шілдесінде президент кеңесшісі және баспасөз хатшысы Руслан Желдібай мәлімдеді.
Мемлекет басшысы халықтан келіп түскен көптеген шағымға байланысты Алакөл маңындағы әйгілі туристік аймақтың демалушыларды қарсы алуға дайындығы төмен екеніне Үкіметтің назарын аударды.
Атап айтқанда, қажетті туристік инфрақұрылым, қызмет көрсету мен қауіпсіздік лайықты деңгейде қамтамасыз етілмеген.
Үкіметке қысқа мерзім ішінде елдегі барлық туристік бағыттың жағдайын ретке келтіріп, олқылық жіберген лауазымды тұлғаларды жауапкершілікке тартуды тапсырды.
