30 маусымда АҚШ-тың Әділет министрлігі Солтүстік Кореяны өзінің қару жасау бағдарламасын қаржыландыруға бағытталған алаяқтық схеманы ұйымдастырды деп айыптады, деп хабарлайды Zakon.kz.
CBS мәліметінше, министрлік бұл әрекеттер АҚШ компаниялары қашықтан жұмыс істеуге жалдаған ІТ саласының қызметкерлерінің жалақылары есебінен жүзеге асқанын түсіндірді. Аталған қызметкерлер бұл схемаларға еріксіз түрде тартылған.
Айыптаулар құқық қорғау органдары қаржылық есепшоттарды, веб-сайттарды және алаяқтық жасау үшін пайдаланылған ноутбуктарды тәркілегеннен кейін жарияланды.
Схемаға мыңдаған жұмысшы қатысқан, олардың барлығына ұрланған немесе жалған жеке куәліктер берілген. Солтүстік Корея үкіметі бұл адамдарды АҚШ компанияларына ІТ-мамандар ретінде жұмысқа орналастырған.
Компаниялар бұл қызметкерлерді АҚШ-та орналасқан деп ойлаған, алайда олардың көбі шын мәнінде Солтүстік Корея немесе Қытай аумағында болған. Ал оларға төленген жалақылар Солтүстік Кореямен байланысты делдалдардың бақылауындағы есепшоттарға аударылып отырған, дейді прокурорлар.
Айыптау қорытындысында, сондай-ақ, бұл схемаға қатысқаны үшін алты Қытай азаматы мен Тайваньнің екі азаматы да айыпталған.
"Бұл алаяқтық схемалар АҚШ компанияларынан қаражат жымқыруға бағытталған және Солтүстік Кореяның заңсыз бағдарламаларын, соның ішінде қару жасау бағдарламасын қаржыландыру мақсатында санкцияларды айналып өтуге арналған", – деді АҚШ Әділет министрлігінің Ұлттық қауіпсіздік бөлімінің басшысы, бас прокурордың көмекшісі Джон Айзенберг.
Әділет министрлігі алаяқтыққа ұшыраған компаниялардың нақты атауын атамады, бірақ кейбір алаяқтар құпия әскери технологияларға қатысты ақпаратқа қол жеткізіп, оны ұрлап үлгергенін мәлімдеді.
