Еліміздің мектептерінде 2025–2026 оқу жылы аяқталуға жақын. Биыл 215 мыңнан түлек мектеп бітіреді. Осыған байланысты Оқу-ағарту министрлігі білім беру ұйымдарында салтанатты іс-шараларды мейрамханаларда, кафелерде, банкет залдарында, табиғат аясында өткізуге тыйым салынатынын ескертті, деп хабарлайды KAZ.NUR.KZ.
Оқу-ағарту министрлігінің мәліметінше, биыл оқу жылын 3,9 млн-нан астам оқушы аяқтайды. Оның ішінде 215 мыңнан астамы – 11-сынып түлектері.
Оқу жылының қорытындысы бойынша 9-сыныпты 31 мыңнан астам оқушы үздік аяқтайды деп күтіліп отыр. Ал 11-сыныпты үздік аяқтауға 18 мың оқушы – үміткер. Бүгінде еліміздің білім беру ұйымдарында 420 мыңнан астам педагог еңбек етуде.
Ведомство өкілдерінің хабарламасына сәйкес, оқу жылының аяқталуына орай 25 мамырда еліміздің мектептерінде “Білімім – Отаныма!” тақырыбында бірыңғай сынып сағаты өткізіледі. Сынып сағаттарында оқу жылы қорытындыланып, оқушылардың жетістіктері мен жарқын сәттері еске алынады. Сондай-ақ оқушыларға жазғы каникул кезінде оқуға ұсынылатын әдебиеттер тізімі таныстырылады.
Осы орайда Оқу-ағарту министрлігі ведомство мектепке дейінгі, орта, техникалық және кәсіптік, орта білімнен кейінгі білім беру ұйымдарында салтанатты іс-шараларды мейрамханаларда, кафелерде, банкет залдарында, демалыс базаларында және табиғат аясында өткізуге тыйым салынатынын ескертті.
“Ата-аналардан, заңды өкілдерден және білім алушылардан салтанатты іс-шараларға байланысты ақша жинауға, сыйлықтар мен өзге де материалдық құндылықтар талап етуге жол берілмейді. Ал аттестаттар мен дипломдарды салтанатты табыстау рәсімдері тек білім беру ұйымдарының қабырғасында ұйымдастырылады”, — делінген хабарламада.
Министрлік пен жергілікті әкімдіктердің бірлескен бұйрығы білім алушылар арасында мектеп бітіру іс-шараларын өткізу кезіндегі қауіпсіздік пен қоғамдық құқықтық тәртіпті қамтамасыз ету, сондай-ақ білім беру ұйымдарында “Заң мен тәртіп” идеологиясын нығайтуды көздейді.
Мәтіннен қате тапсаңыз, бізге жазыңыз
