Премьер-министрдің орынбасары – Ұлттық экономика министрі Серік Жұманғариннің төрағалығымен өткен экономикалық өсімді қамтамасыз ету жөніндегі штабтың кезекті отырысында биылғы жылдың қорытынды көрсеткіштері мен келесі жылы экономикалық өсімді қолдаудың негізгі тәсілдері қаралды.
Отырыс барысында өңдеуші өнеркәсіптің жай-күйіне ерекше назар аударылды. Жыл басынан бергі 11 айдың қорытындысында саладағы нақты көлем индексі 105,9 пайызды құрады. Ал биылғы жылдың қорытындысында өңдеуші өнеркәсіпте өсім шамамен 6 пайыз деңгейінде болады деп күтіліп отыр.
Биыл негізгі өңдеу салаларының даму болжамына сәйкес өңдеуші өнеркәсіп құрылымының 40 пайызын құрайтын металлургияда өсім 1,1 пайызды құрайды. Машина жасау саласы (17,5%) 12 пайыздық өсім көрсетеді деп жоспарланған. Тамақ өнеркәсібінде (13,1%) – 9 пайыз, құрылыс материалдарын өндіруде (5,6%) – 6 пайыз, химия өнеркәсібінде (5,4%) – 6 пайыз, ал жеңіл өнеркәсіпте (0,7%) 5 пайыз өсім күтіледі.
Штаб отырысында өңдеуші өнеркәсіптің экономикалық өсімнің басты драйверлерінің бірі ретіндегі болашағы жан-жақты талқыланды. Түсті және қара металлургияның даму перспективалары, «Бәйтерек» холдингі арқылы қаржыландырылатын жобалардың іске асырылу барысы, өңірлердегі инфрақұрылымның жай-күйі мен саланың тұрақты дамуына ықпал ететін өзге де факторлар қарастырылды.
Өңірлердің ресурстық және инфрақұрылымдық әлеуетін тиімді пайдалану қажеттігін ескере отырып, Серік Жұманғарин келесі жылы өңдеуші өнеркәсіп салаларындағы өсім қарқынын қамтамасыз етуге арналған жол картасын әзірлеуді тапсырды. Құжатта экономикалық өсімге аса маңызды шаралармен қатар, жеңіл өнеркәсіп пен құрылыс материалдары өндірісін қолдау тетіктері қамтылмақ.
Сауда саласында да оң динамика сақталып отыр. 11 айдың қорытындысы бойынша нақты көлем индексі 8,8 пайызды құраса, жыл соңында бұл көрсеткіш 8,9 пайызға жетеді деп күтіледі. Сауда өсімінің жиынтық үлесінің шамамен 72 пайызы бес өңірге тиесілі.
Атап айтқанда, Алматы қаласында сауда көлемі 24,6 трлн теңгені құрап, автомобильдер, машиналар мен жабдықтар, фармацевтикалық өнімдер мен шоколад саудасы басым болды. Астанада 10,9 трлн теңгеге табиғи газ, дизель отыны, авиациялық бензин мен керосин, ет пен сүт өнімдері сатылған. Атырау облысында (6,7 трлн теңге) мұнай өнімдері мен машиналар, Қарағанды облысында (4,5 трлн теңге) фармацевтикалық тауарлар, техника және косметика өнімдері, ал Шымкент қаласында (3,6 трлн теңге) фармацевтика, жанар-жағармай мен агроөнеркәсіп кешені өнімдері негізгі үлес қосты.
Бөлшек сауда құрылымында шамамен 760 мың бизнес субъектісі жұмыс істейді. Жеке кәсіпкерлердің тауар айналымы 10 пайызға өсіп, 8,2 трлн теңгеге жетті. Оперативті деректерге сәйкес 11 айдағы онлайн-сатылым көлемі 3,3 трлн теңгені құрап, өткен жылдың сәйкес кезеңімен салыстырғанда 14,4 пайызға артты.
Ауыл шаруашылығы саласы да барлық бағыт бойынша тұрақты өсім көрсетуде.
11 айдың қорытындысында нақты көлем индексі 106,1 пайызды құрады. Жылдық өсім 5 пайыз деңгейінде болжанып отыр, бұл жоспарлы көрсеткіштен 3 пайызға жоғары.
Республикалық орташа деңгейден жоғары өсім Ақмола (115,7%), Қостанай (115,4%), Солтүстік Қазақстан (110,5%), Павлодар (108,2%) мен Атырау (107,4%) облыстарында тіркелді.
Дәстүрлі дақылдардан алынған тұрақты жоғары өнім аясында биылғы жылы майлы және бұршақты дақылдар айқын өсім нүктесіне айналды. Бұршақты дақылдардан рекордтық – 1,1 млн тоннадан астам өнім жиналды. Ал майлы дақылдар өндірісі алғаш рет 4,7 млн тоннаға жетті. Мақта жинау көлемі 428 мың тоннаны құрап, кейінгі 18 жылдағы ең жоғары көрсеткішке шықты. Өнімділік гектарына 29,6 центнер болды.
Осылайша, негізгі салалардағы оң серпін мен нақты қолдау шаралары алдағы жылдары экономикалық өсімді тұрақты қамтамасыз етуге негіз болмақ.
