Өткен сенбіде күні еліміздің барлық өңірінде 47 ауыл шаруашылығы жәрмеңкесі өтті.
Аталған шара барысында қазақстандықтар 195 тоннадан астам сиыр етін сатып алған, деп жазады inbusiness.kz сайты Сауда және интеграция министрлігіне сілтеме жасап.
Жәрмеңкелерге 400-ден астам отандық өндіруші қатысып, өнімдерін тікелей ұсынды. Сиыр етіне сұраныс ерекше жоғары болды: Қостанай облысында рекордтық 83 тонна, Астанада 61 тонна, Абай облысында 19 тонна ет сатылды. Баға өңірлерге қарай 2400-ден 3700 теңгеге дейін өзгерді.
Қызылорда облысында қолжетімділік бойынша ең төменгі баға – 2400-2500 теңге аралығында болды.
Жәрмеңкелерде әлеуметтік маңызы бар азық-түлік тауарлары қолжетімді бағамен ұсынылды. Мәселен, Қарағандыда басталған "Ауыл береке – 2025" жәрмеңкесінде 120 тоннадан астам тауар сатылымға шығарылып, оның ішінде 52 тонна ет, 25 тонна картоп, сүт, балық және жұмыртқа болды.
Сауда және интеграция министрлігінің мәліметінше, жыл соңына дейін 1300-ден астам жәрмеңке өткізу жоспарланып отыр. Бұл халыққа қыстық азықты тиімді бағамен алдын ала алуға мүмкіндік бермек.
