Батыс Қазақстан облысында Бәйтерек аудандық Дариян модельді балалар кітапханасында "Қазақстан халқына" қоғамдық қоры ұйымдастырған өңірлік баспасөз туры өтті. Шара барысында қор өкілдері мен журналистер күрделі жөндеуден өтіп, жаңа кейіпке енген кітапхана жұмысымен танысты.
Қордың қайырымдылық жобаларының ішіндегі маңызды бастамалардың бірі – ауылдық кітапханаларды "Jaña klub" комьюнити-орталықтарына айналдыру. Бұл жоба бірнеше бағытты қамтиды. Атап айтсақ, ауылдық кітапханалардың шамамен 9 мың шаршы метр аумағын жаңғыртып, заманауи инфрақұрылым құру, балалар мен ересектерге арналған клубтар мен үйірмелер ашу арқылы тұрғындардың бос уақытын тиімді өткізуіне жағдай жасау және кітапхана қызметкерлерінің кәсіби біліктілігін арттыру.
Дариян модельді балалар кітапханасын жабдықтауға 26 млн теңгеден астам қаржы жұмсалған. Бүгінде кітапхана негізгі қызметін сақтай отырып, тұрғындарға жаңа мүмкіндіктер ұсынуда. Баспасөз турына қатысушыларғакреативті кеңістік, заманауи жиһазбен жабдықталған музыкалық бөлме және BiblioKids таныстырылды.
"Қазақстан халқына" қорының аға жоба менеджері Динара Нұрқасымованың айтуынша, 2022 жылдан бері қор 24 ауқымды жобаныжүзеге асырған. Олар мәдениет, денсаулық сақтау және әлеуметтік қолдау салаларын қамтиды. Тек Батыс Қазақстан облысына бөлінген қаражат көлемі – 11,3 млрд теңге.
"Мәдениет саласындағы флагман жобамыз – ауылдық кітапханалар базасында жаңа форматтағы комьюнити-орталықтар ашу. Бұл жоба тек Батыс Қазақстан облысында жүзеге асуда. Облыс бойынша 25 кітапхана базасында жаңа клубтар ашылды, оның 5-еуі – Бәйтерек ауданында. Жалпы жобаға 800 млн теңгеге жуық қаражат бағытталды", – деді жоба жетекшісі.
Жоба "Тана" қоғамдық қоры және жергілікті атқарушы органдардың серіктестігімен іске асуда.
"Бұл БҚО бойынша жүзеге асқан ауқымды мәдени, кітапхана жұмысын заманауи форматқа көшіруге бағытталған алғашқы ауқымды жоба. Мұнда домбыра, шахмат, дойбы, нарды, тоғыз құмалақ, арт бұрышы, қолөнер мен тігін үйірмелері бар. Сонымен қатар жастар үшін бос кеңістік қарастырылып, олар валберис, Kaspi-дүкендер ашып, кәсіп бастауға мүмкіндік алуда. коворкинг аймақтарында интернетке қосылған компьютерлерді тегін пайдалануға болады", — дейді "Тана" қоғамдық қорының жоба менеджері Динара Сейткалиева.
Жоба аясында жиһаз, құрал-жабдықтан бөлек аймақтың кітапхана қоры 20 мыңнан астам жаңа кітаппен толыққан. "Тана" қоғамдық қорының қолдауымен 40 адам біліктілігін арттыру курсынан өткен. Олардың қатарындағы 12-сі бәйтеректік кітапханашы.
БҚО әкімдігі ұсынған материал
