Биыл Қазақстанның конституциясының қабылданғанына 30 жыл болады. Осыған байланысты үкімет арнайы шаралар туралы қаулы шығарды. Мерекені тойлауға мемлекеттік сатып алулар сайтында да бірнеше тендер жарияланды. Factcheck.kz жұмсалатын қаржыларға тоқталып көрді, — деп хабарлайды Massaget.kz тілшісі.
Биыл ақпанда ҚР Премьер-Министрі Конституциясының 30 жылдығына арналған "Ата Заң – тәуелсіздік тірегі" ұлттық іс-шаралар жоспарын бекіту туралы арнайы қаулыға қол қойды. Қаулыда конституцияға байланысты жыл бойы жасалатын шаралар туралы ақпарат бар. Құжатта жұмсалатын қаржылардың бірнеше көзі бар екені көрсетіледі. Мәселен, жергілікті немесе республикалық бюджет. Сондай-ақ, бюджет есебінен тыс және қаржы талап етілмейтін шараларда бар. Бір қызығы, арнайы қаржыландыру көлемі деген баған болса да, онда жұмсалатын шығындар жазылмаған.
Премьер министр бекіткен құжатта іс-шаралар үш бағытқа бөлінетіні көрсетіледі. Алғашқысы, ұйымдастырушылық іс-шаралар, бұл бағытқа мерейтойлық монеталар шығару, азаматтарды салтанатты түрде наградтау секілді қызметтер кіретіне болса, екінші бағыты ғылыми-практикалық іс-шаралар. Бұл шаралаға баспасөз мақалаларын дайындау және ресми интернет-ресурстарда орналастыру секілді қызметтер жатады. Және соңғы бағыты ақпараттық-ағартушылық іс-шаралар, яғни мектеп жасындағы балаларға арналған онлайн викторина, дөңгелек үстелдер мен мерекелік концерттер өткізу кіреді екен.
Астанада әкімдігінің тендерлері
"Әділет Тірегі – Ата Заң" концерті
Енді негізгі тендерлерге тоқталайық. Астана қаласы әкімдігінің "мәдени іс-шараларды өткізу дирекциясы" мемлекеттік коммуналдық қазыналық кәсіпорны Конституцияның 30 жылдығына орай өтетін "Әділет Тірегі – Ата Заң" жобасына байланысты 8 тендер жариялаған. Тендерлердің техникалық сипаттамаларында әншілердің, оркестр мен ансамблдердің қатысуымен концерт өтетіні жазылған. 10 000 000 теңге шараның техникалық жабдықтарды қамтамасыз етуге жұмсалмақ. 800 000 теңгеге қатысушыларға уақытша тұру үшін қонақүй жалдау қызметі кіреді. Осы екі тендер материал жазылып жатқан уақытта өтінім қабылдау кезеңінде тұрды. Қатысушыларға жүру билеттерін брондау және сату қызметтеріне 1 700 000 теңге қарастырылған. Жеңімпаз — "DanAia" жауапкершілігі шектеулі серіктестігі. Шара аясында жүргізушімен шағын автобусты жалға алуға 357 000 теңге кетеді екен. Тендер жеңімпазы — "Алаш" ЖШС-і. Графикалық қызметтерге 2 000 000 теңге бөлінген. Жеткізуші — "ImaTum" ЖШС-і. Жобаға дыбыстық жабдықтарды жалға алуға 5 000 000 теңге бөлініп, тендер жеңімпазы — "Алға2022" ЖШС-і атанды. Полиграфиялық өнімдерді әзірлеуге 400 000 теңге, жеткізуші — "ДОБРОВОЛЬНОЕ ОБЩЕСТВО ИНВАЛИДОВ МЕРЕЙ" қоғамдық бірлестігі. Конференц-залдарды, көрме залдарды және ұқсас жайларды брондауға 4 211 111 теңге, жеткізуші — "AVM" ЖШС мекемесі танылған. Сонда жалпы "Әділет Тірегі – Ата Заң" жобасына 24 468 111 теңге жұмсалмақ.
Астана қаласының әкімдігіне қарасты мәдениет басқармасы кейінгі 2 айда өзге концерттер ұйымдастыруға тендер жарияламады. Бірақ, Ticketon.kz сайтынан, осы мерекеге байланысты Астанада өтетін "Жасай бер, Қазақ ЕЛІ!" және "Ата заң – азат елдің аркауы!" атаулы концерттерді байқадық. Екі шараның да жарнамасында Астана әкімдігінің логосы көрсетілген. Қызығы мемлекеттік сатып алулар порталында көрсетіліп, 24 млн теңге қарастырылған "Әділет Тірегі – Ата Заң" концертінің жарнамасы еш жерде жоқ.
Елордадағы спортқа байланысты жарияланған тендерлер
Астана қаласы әкімдігінің "Спорттық-бұқаралық іс-шараларды өткізу дирекциясы" коммуналдық мемлекеттік мекемесі Конституция күніне арналған бірнеше спорттық жарысқа ақша бөлді. Веломарафон – 4 951 000 теңге бөлінсе, секіру жарысына 17 904 715 теңге қарастырылған. Жаппай жүгіру жарысына 13 392 857 теңге, бәйгеге 29 318 000 теңге, жұмсалмақ. Аталған тендерлердің жеңімпазы — "EventSport Group" ЖШС-і.
Аудандық әкімдіктер мен Астана қаласы әкімдігі басқармаларының қызметкерлері арасында волейболдан (10 714 285 теңге), футболдан (10 714 285 теңге), шағын футболдан (10 714 285 теңге) жарыстарға жұмсалмақ. Волейбол мен футбол туралы тендерлер материал жазылып жатқан кезеңде өтінім қабылдау кезеңінде тұса, шағын футболға қатысты тендер "құжаттар өзгерітілді" деген статуста тұрды.
Сонда Астана әкімдігі конституция күніне байланысты өтетін спорттық шараларға 74 853 712 теңге бөлген. Әлеуметтік желілерде "Астана Орманы веложолында жарыс", "Saryarqa Run" жүгіру марафоны секілді шаралар өтетіні көрсетілген.
Өзге өңірлер қанша жұмсап жатыр?
Астанадан бөлек өзге де өңірлер тендер жариялаған. Мәселен, Ақмола облысының ішкі саясат басқармасы мерекелік іс-шараға 2 678 571 теңге бөлген болса, Атырау облысы Мәдениет және тілдерді дамыту бөлімі салтанатты шараны ұйымдастыру және өткізу қызметіне 6 964 285 теңгелік тендер жариялады. Сондай-ақ, облыстың ішкі саясат басқармасы мерекеге байланысты өтетін "Жас Эрудит" интелектуалды сайысын өткізуге 1 000 000 теңге жұмсамақ. Қызылорда облысының Полиция департаменті Спорттық және ұқсас іс-шараларды ұйымдастыру бойынша қызметтер 1 156 250 теңге бөлді. Осы облыстың дін істері басқармасы балалар арасында сурет салу сайысын ұйымдастыруға 977 591 теңгелік тендер ұйымдастырды. Батыс Қазақстан Облысына қарасты "Қаратөбе аудандық мәдениет, тілдерді дамыту, дене шынықтыру және спорт бөлімі "Ата заң-алтын тұғырым" шарасына 1 725 000 теңге жұмсамақ. "Жетісу облысының мәдениет, архивтер және құжатттама басқармасы" ММ-і, "Айбары асқақ Ата Заң" мәдени-көпшілік шара ұйымдастырып өткізу 5 357 142 теңге бөлді. Жамбыл облысы әкімдігінің ақпарат және қоғамдық даму басқармасы мерекеге байланысты PR шара ұйымдастыруға 3 571 428 теңге қарастырса, "Ақтөбе қаласының ішкі саясат бөлімі" ММ-і туристтік слетін ұйымдастыруға 2 232 142 теңге жұмсайды. Жезқазған қаласындағы мәдениет және тілдерді дамыту бөлімі мерекелік концертті ұйымдастыруға 5 262 000 теңге бөлді.
25, 20, 15 жылдықта қалай тойланды?
Осындан 5 жыл бұрын аталып өтілген Конституцияның 25 жылдығына орай, сол кездегі үкімет басшысы болған А.Мамин де биылғыдай арнайы қаулы жариялаған. Қызығы онда республикалық және жергілікті бюджеттен жұмсалатын шығындар көлемі көрсетілген. Құжаттан 276 759 000 000 теңге қарастырылғанын байқаймыз. 10 жыл бұрын, 2015 жылы, конституцияның 20 жылдығына да арнайы қаулы шығарылған еді. Ол кезде де бюджеті көрсетіліп, жалпы жоспарлаған сома 997 192 000 теңге болған. Сондай-ақ, 15 жыл бұрын, 2010 жылы конституцияның 15 жылдығы аталып өтті. Сол кезде де арнайы үкімет қаулысы қабылданған. Ол құжатта көрсетілген сома 1 181 651 008 теңге. Конституцияның 5 және 10 жылдығын атап өтуге, 2000 және 2005 жылдары қабылданған қаулылар да қаражат мөлшері көрсетілмесе де, сол жылдары осы күнге арналған Халықаралық ғылыми-практикалық конференцияны өткізуге жұмсалған шығындар жазылған. 2000 жылы 11 528 220 теңге кеткен болса, 2005 жылы шығын екі есе өсіп, 21 548 006 теңге бөлінген екен. Конституция қабылданғалы әр бес жыл сайын тойланған шаралардың бюджеті осы күнге дейін көрсетіліп келсе де, биылғы жоспарда шығындар сомасы неге жазылмағаны түсініксіз.
Factcheck.kz редакциясы ҚР үкіметіне ресми сауал жолдап көрді. Жауап келу уақыты 5 жұмыс күнге созылып, мереке өтіп кететін ескерсек, материалды алдын ала шығарып, үкімет жауабына байланысты өзгертуіміз мүмкін.
Қызықты жаңалықтар мен видеоларды көру үшін TikTok арнамызға жазылыңыз!
