2025 жылғы 8–10 тамыз аралығында Астанада «Самұрық-Қазына» ұлттық әл-ауқат қоры ұйымдастырған X cпартакиада жоғары деңгейде өтті. Биылғы ауқымды спорттық шара Мемлекет басшысы Қасым-Жомарт Тоқаевтың бастамасымен жарияланған Жұмысшы мамандықтары жылына орай ұйымдастырылды.
14 спорт түрінен бақ сынасты
Мерейтойлық додаға еліміздің түкпір-түкпірінен қорға қарасты ірі компаниялар мен кәсіпорындардың 1000-нан астам қызметкері қатысты. Қатысушылардың басым бөлігі – көлік, энергетика, теміржол, мұнай-газ, байланыс және басқа да жетекші салалар бойынша өндірісте еңбек етіп жүрген мамандар.
Биыл спорттық шараның бағдарламасы жаңа спорт түрлерімен толықты. Қатысушылар волейбол, баскетбол, футзал, жүзу, үстел теннисі, қол күресімен қатар, дәстүрлі спорт түрлері – садақ ату, арқан тарту, асық ату, тоғызқұмалақ және заманауи спорт түріне жататын киберспорт бойынша командалық және жеке сайыстарда өнер көрсетті. Сонымен қатар биыл шараға ерекше қажеттілігі бар жандар да белсенді қатысып, дартс пен үстел теннисінен өзге әріптестерімен қатар жақсы нәтиже көрсетті.
Үш күнге созылған тартысты жарыстардың қорытындысы бойынша жалпыкомандалық есепте бірінші орынды дәстүрлі түрде «Қазақстан темір жолы» командасы иеленді. Теміржолшылардың қоржынына 11 алтын, 8 күміс, 9 қола медаль түсіп, екінші жыл қатарынан үздіктердің үздігі екенін дәлелдеді. Екінші орынды – 8 алтын, 6 күміс, 4 қоламен «ҚазМұнайГаз» еншілеп, мұнайшылардың да жұмыста да, спортта да мықты екенін көрсетті. Ал үшінші орын – 4 алтын, 5 күміс, 6 қола жеңіп алған «QazaqGaz» ұжымына бұйырды. Үздік бестік қатарында «Қазақтелеком» мен «Самұрық-Энерго» да бой көрсетті.
Спортты белсенді қолдайды
Еліміздегі ірі компаниялар мен кәсіпорын жұмысшыларының басын бір ортаға біріктіріп, спорт пен еңбек адамын насихаттауды белсенді қолдайтын «Самұрық-Қазына» ұйымы спорттық шараны жылда ұйымдастырады. Дегенмен, спортты өз компаниялары ішінде ғана қолдаумен шектелмейді. Ұлттық әл-ауқат қоры бүкіл ел бойынша спорттық ғимараттар мен нысандарды салуда. Қор басшысы Нұрлан Жақыповтың айтуынша, халықтың, әсіресе өскелең ұрпақтың дені сау болуы үшін дұрыс жағдай жасап, спорттық инфрақұрылымды дамыту маңызды:
«Спорт – біз үшін маңызды бағыт. Спортты тек ұйым ішінде ғана қолдап қоймай, қазақстандықтар үшін спорттық инфрақұрылымдарды да салумен айналысып жатырмыз. Соңғы үш жылда 15 спорт кешенін аштық. Бүгінде осы кешендерде 90 мыңдай бала жаттығып жүр. Биыл Ақмола облысында 200 бала жаттығатын жаңа спорт нысаны ашылды. Жыл соңына дейін Таразда ұзақ өмір сүру орталығы, Маңғыстау және Батыс Қазақстан облыстарында спорт кешендерін пайдалануға беруді жоспарлап отырмыз», – деді ол.
Сонымен қатар «Саламатты болашақ» жобасы аясында 14 өңірдің 23 елді мекенінде 11 бейімделген спорт түрі бойынша секциялар жұмыс істейді. Қазір мұнда жаттығып жүрген 910 баланың біразы ұлттық құрамаларға қабылданып, ел намысын халықаралық ареналарда қорғап жүр.
Спартакиаданың ерекше сәттері
Қор басшысы Нұрлан Жақыпов та спартакиадаға 400 метрге жүзуден қатысып, 45-49 жас санатындағылар арасында бірінші орын алып, «Samruk United» командасының қоржынына алғашқы алтын медальды түсірді. Осылайша, «Самұрық-Қазына» басшысы өз мысалымен әріптестеріне үлгі болып, спортпен айналысудың маңызды екенін көрсетті.
Волейболдан «ҚазМұнайГаздың» ерлер де, әйелдер құрамасы да мықты болды. Айта кету керек, мұнайшылардан құралған ерлер командасы биыл алтыншы мәрте спартакиаданың чемпионы атанып отыр.
Ал дүбірлі доданың жеңімпаздарына жүлделерді Олимпиада чемпионы Дмитрий Баландин табыстады. «Спартакиада әртүрлі жастағы, түрлі қызметтегі адамдарды біріктірді. Спорт — өміріміздің маңызды бөлігі. Әрі қарай да өз біліктіліктеріңізді шыңдап, жетілдіре бересіздер деп сенемін. Осындай жоғары нәтиже көрсетіп жатқандарыңыз спортшы ретінде мені қатты қуантады», деді ол өз сөзінде.
Әлеуметтік жауапкершілік – басым бағыт
Қордың тағы бір басым бағыттарының бірі — қайырымдылық. Спартакиада аясында «Мейірімділік мекені» атты қайырымдылық жәрмеңкесі өтті. Онда ерекше балалар салған суреттермен безендірілген свитшоттар, шопперлер, футболкалар, қолөнер бұйымдары сатылды. Барлық түскен 1,2 млн теңгеден астам қаражат қордың бірыңғай қайырымдылық операторы «Samruk-Kazyna Trust» қорының шотына аударылды. Бұл сома мектептерде ерекше қажеттілігі бар балалар үшін инклюзияны қолдау кабинеттерін ашуға бағытталады.
«Самұрық-Қазына» осындай игі шараларды жиі өткізіп тұрады. Мәселен, көктемде ұйымдастырылған қайырымдылық марафонынан шамамен 208 миллион теңге жиналды. Түскен қаражатқа биыл елорда мектептерінде 10 инклюзия кабинеті ашылмақ.
Еңбек адамы – елдің тірегі
2025 жылдың Жұмысшы мамандықтары жылы деп жариялануы – қарапайым еңбек адамының мәртебесін арттыруға, білікті кадрларды қолдауға, өндірістік еңбектің ел экономикасындағы рөлін нығайтуға бағытталған маңызды қадам. Президент Қасым-Жомарт Тоқаев атап өткендей, еліміздің әрбір жетістігінің артында энергетик, машинист, металлург, мұнайшы, құрылысшы, механик сияқты іргелі елдің ертеңіне күн сайын нақты үлесін қосып жүрген мамандар тұр.
Мерейтойлық спартакиада – спорт, еңбек және бірліктің жарқын мерекесі болды. Мұндай бастамалар ұжымдық рухты нығайтып, елдің өндірістік әлеуетін арттыруға үлес қосары сөзсіз.
Жансая Қапасқызы
