“Ақжайық” мемлекеттік табиғи резерватының аумағындағы өрт толықтай сөндірілді. Бұл туралы Атырау облысының әкімдігінің баспасөз қызметіне сілтеме жасаған KAZ.NUR.KZ хабарлайды.
“24 маусым сағат 14:00-дегі жағдай бойынша “Ақжайық” МТР өрт толығымен сөндірілді. Алдын ала болжам бойынша қызыл жалын 1510 гектар аумақты шарпыған”, — делінген хабарламада.
Әкімдіктің мәліметінше, 13 маусымнан бері “Қазавиақұтқару” АҚ МИ-8 екі тікұшағы арқылы 396 тонна су төгілген.
Өрт шалған аумақтың ауқымын ұлғайтпау мақсатында тракторлардың көмегімен минералды жолақтар жыртылған. Жалпы тілсіз жауды толықтай сөндіруге 200-ге тарта адам мен 40 техника жұмылдырылған.
“Өрттің қайта тұтанбауы үшін және жағдайды тұрақты бақылау мақсатында ТЖД, полиция және резерват қызметкерлерінің тәулік бойына қойылған. Кезекшілік әлі де жалғасады”, — делінген хабарламада.
