Абай облысында Қытай елінің азаматтарына тиісу фактісі бойынша тергеу басталды.
Бұл туралы Caravan.kz медиа порталы хабарлайды. Облыстық полиция департаменті оқиғаға қатысты түсініктеме берді. Жақында әлеуметтік желілерде шетелдік азаматтардың тыныш отырып тамақтанып жатқан сәті түсірілген видео пайда болды. Сол сәтте оларға екі жұпыны киінген ер адам жақындап: «кімсіңдер?» және «қазақша білесіңдер ме?» — деп сұрақтар қоя бастаған. Бұл бейнежазба құқық қорғау органдарының назарын бірден аударды. Белгілі болғандай, оқиға Аягөз қаласындағы жол бойындағы дәмханада болған. Полиция қызметкерлері оқиғаға қатысы бар тұлғаларды дереу анықтады. Анықталғандай, олардың біреуі бұрын бірнеше рет бұзақылық, есірткі заттарын заңсыз сақтау және ауыр дене жарақатын келтіру фактілері бойынша қылмыстық жауапкершілікке тартылған. Полиция бөліміне жеткізілгеннен кейін ер адамдарға қатысты әкімшілік іс қозғалды. Сот қаулысына сәйкес, екеуі де әкімшілік жауапкершілікке тартылды: бұрын сотталған кейіпкер 10 тәулікке арнайы қабылдағышқа қамалды, ал екіншісі ҚР ӘҚБтК-нің 434-бабы («жеке тұлғаларға қорлап тиiсу») бойынша 20 АЕК (шамамен 80 000 теңге) көлемінде айыппұл төлеуге міндеттелді. «Қоғамдық тәртіпті бұзатын және Қазақстан Республикасы имиджіне нұқсан келтіретін кез келген әрекеттер қатаң әрі дереу тоқтатылады. Өңірде құқықтық тәртіпті қамтамасыз ету жұмыстары күшейтілген режимде жалғасуда», — деп хабарлады Абай облысы ПД. Көпшілік шетел азаматтарына қолдау білдіріп, шектен тыс надандықты көрсетпеуді сұраған. 
