Абай облысында қасқыр көбейіп, жұртты шырғалаңға салды. Әсіресе түз тағысы Абай ауданындағы қожалықтарға маза бермей жатыр. Ауыл тұрғындарының айтуынша, биыл аш жыртқыштар бір ауданда 450-ден астам сиыр, қой және жылқыны жоқ қылған. Фермерлерге келтірілген залал 160 миллион теңгеден асады, — деп хабарлайды Massaget.kz тілшісі КТК арнасына сілтеме жасап.
"Түз тағысы көбейіп кетті. Қожалықтың жанына келіп, сол жерден жеп кетеді. Мен шаруа қожалығының жетекшісімін. Жылқыдан жылқыдай, сиырдан сиырдай, міне, неше жыл болды, басып қалады", – дейді тұрғын Талғат Ерденбеков.
Тұрғындардың айтуынша, екі жылдан бері түз тағысы малға маза бермей жатыр. Жаздың өзінде шаруашылықтардың әрқайсынан, кем дегенде, 5-6 басты қырып кеткен. Ауданда қасқырға жем болған төрт-түліктің шығыны 162 миллион теңгеге жетті. Алайда көбейген жыртқыштың санын дереу реттеу мүмкін болмай тұр. Себебі, бұл ауданның төңірегі тау-тас, көлікпен аңшылық құру қолайсыз. Енді бар үміт — қыран бүркіт пен қазақ тазысын баптап жүрген азаматтарда.
"Тау-бөктерінде орналасқандықтан, арнайы техника шаналар немесе көлікпен жүріп аулау өте қиын. Сол себепті, 2023 жылы арнайы аңшылар шақырылды. Былтыр да 14 аңшы шақырылып, оларға оқ-дәрі, басқа да жабдықтар берілді. Алайда екі жылғы жұмыстан нәтиже болмады", – деді Кеңгірбай би ауылдық округінің әкімі Дархан Амангелдин
Өзекті жаңалықтарды өз уақытында оқу үшін Facebook парақшамызға жазылыңыз!
