Қайтарылған активтер қаражаты есебінен 160 млрд теңге сумен жабдықтау жобаларына бағытталды, деп хабарлайды Үкіметтің баспасөз қызметінен.
Мемлекет басшысының тапсырмалары аясында елімізде азаматтарды сумен қамтамасыз етуге бағытталған жобаларды іске асыру жалғасуда. Осы мақсаттарға бірнеше қаржы көздерінен, оның ішінде Арнаулы мемлекеттік қор қаражатынан қаржы бөлінеді.
Премьер-министр Олжас Бектенов Үкімет отырысы барысында Арнаулы мемлекеттік қордан 230 сумен жабдықтау жобасын жүзеге асыруға 160 млрд теңге қарастырылғанын атап өтті.
Жалпы, қаржыландыру көлемі 284,3 млрд теңгені құрайды. Қаражат екі министрлікке бағытталады.
Өнеркәсіп және құрылыс министрлігі арқылы 183,4 млрд теңге бөлінеді, оның 101,3 млрд теңгесі — Арнаулы мемлекеттік қордан.
Су ресурстары және ирригация министрлігі арқылы 100,9 млрд теңге бөлінеді, оның ішінде Арнаулы мемлекеттік қордан 59,3 млрд теңге қарастырылған.
