Мемлекеттік қызметкерлер құмар ойынға әуестігі үшін жазалануы мүмкін . Қоғам аталмыш жағдайды мұқият бақылап отыр.
Шымкентте бірден 50 мемлекеттік қызметкер құмар ойындарға қатысқаны үшін қызметінен қуылуы мүмкін. Қалалық прокуратура жүргізген тексеру барысында жергілікті атқарушы органдар қызметкерлерінің қаржылық белсенділігі талданған. Нәтижесінде, ондаған шенеуніктің заңмен тыйым салынғанына қарамастан, белсенді түрде онлайн-бәс тіккені анықталды, деп хабарлайды Caravan.kz медиа порталы otyrar.kz-ке сілтеме жасап.
«Прокуратура жергілікті атқарушы органдардың қызметкерлері арасында талдау жүргізді. 161 адамның онлайн-платформа арқылы бәс тіккені анықталды. Соның 50-і жаңа заң күшіне енгеннен кейін. Жалпы бәс тігілген сома 443 миллион теңгені құрады», — деді Шымкент қаласы прокуратурасы басқарма басшысының орынбасары Бекжан Құлатаев.
2024 жылы Қазақстанда мемлекеттік қызметкерлерге құмар ойындардың кез келген түріне қатысуға қатаң тыйым салатын заң күшіне енді. Бұл тыйым офлайн казиноларға да, интернет арқылы бәс тігуге де қатысты. Аталған норманы бұзу сыбайлас жемқорлыққа қарсы заңнаманы және мемлекеттік қызмет этикасын өрескел бұзу деп есептеледі.
«Жаңа сыбайлас жемқорлыққа қарсы нормаларға сәйкес, интернет арқылы құмар ойындарға қатысу – еңбек шартын бұзу үшін негіз болып саналады. Бұл шешім құқықтық статистика органдарында тіркелуге тиіс және өзге де тәртіптік шараларға әкеп соғуы мүмкін», — деді ол.
Прокурорлық тексеру нәтижесінде бақылау актісі дайындалды. Қызметтік тәртіпті бұзған шенеуніктердің әрекеттері тәртіптік комиссия отырыстарында қаралуда. Оларға жұмыстан шығарылу және мемлекеттік қызметке қайта кіруге тыйым салыну қаупі төніп тұр.
Тағы бір алаңдатарлық жайт. Олар бәс тігуге қаржыны қайдан алды? Прокуратура материалдарында 2024 жылдың басынан бастап Шымкенттегі 161 мемлекеттік қызметкер онлайн-ставкаларға 757 миллион теңге жұмсағаны айтылған. Бұл сома олардың ресми табыстарымен салыстырғанда күмән туғызады. Қызметкерлер мұндай қаражатты қалай тапты — әзірге белгісіз. Бұл жайт бөлек қаржылық тергеу нысанына айналуы мүмкін, дейді заңгерлер.
Сонымен қатар, психологтар құмар ойынға тәуелділік — психологиялық көмек пен мамандардың араласуын қажет ететін ауру екенін ескертеді. Қазірге дейін бұл шенеуніктердің кәсіби көмек алып жатқаны туралы нақты ақпарат жоқ.
Айта кетейік, Қазақстан азаматтары үшін құмар ойындарға және бәс тігуге ерікті түрде 10 жылға дейін тыйым салуға болады. Мұны eGov Mobile қосымшасы арқылы өз бетінше өтініш беру арқылы рәсімдеуге болады.
Шымкенттегі дау жемқорлықтың жаңа заңнамасына қатысты тіркелген ең үлкен шулы оқиға. Оның салдары өзге өңірлер үшін де маңызды құқықтық прецедентке айналуы мүмкін.
